धरानको भाबि मेयरको रुपमा चर्चाको सिखरमा रहेका तारा सुब्बाको ब्याक्तिगत र राजनैतिक पृष्ठभुमि:

धरानका चम्किला ताराTara

 

आज भन्दा ५१ बर्ष अघि २०२३ साल माघ १८ गतेका दिन पहाडी जिल्ला तेह्रथुमको खाम्लालुङ गाविस ८ स्थित एक किसान परिवारमा तारा सुब्बाको जन्म भएको थियो । बुबा अजिरसिंह लिम्बु र आमा कुलमाया लिम्बुको ४ छोरा र ३ छोरीमध्ये कान्छा छोराकोरुपमा उहाँले धर्तीमा पाइला टेक्नु भएको थियो ।

किसान परिवारमा जन्मनु भएका तारा सुब्बाले जीवनको अनेकौ उतारचढाव र संघर्षका खुटकिलाहरु पार गर्दै अहिले धरानमा चम्किलो ताराकोरुपमा चम्किरहनु भएको छ । धरानमा तारा सुब्बालाई नचिन्ने सायदै कोही होलान् । अझ राजनीतिक वृत्तमा त उहाँ एक निष्ठावान, बोल्ड निर्णय लिनसक्ने, प्रष्टवक्ता र कुशल नेताकोरुपमा परिचित हुनुहुन्छ । नेकपा एमालेको धरान उपमहानगर कमिटिलाई तेस्रो पटक अध्यक्षकोरुपमा कुशलतापुर्वक हाँकिरहनु भएको छ भने नेपालमा २० बर्षपछि हुन लागेको स्थानीय तहको निर्वाचनमा नेकपा एमालेकोतर्फबाट मेयरको उम्मेद्वार हुनुहुन्छ । निर्वाचनमा जित हात पारेर धरानमा एमालेको झण्डा फहराउन र जनपक्षीय काम गर्न उहाँ लालयित पनि हुनुन्छ ।

 

राजनीतिमा प्रवेश

 

आफ्नो बाल्यकाल पहाडमै बिताउनु भएका सुब्बाले ३ कक्षासम्म खाम्लालुङको कालिका प्राविमा अध्ययन गर्नुभएको थियो । त्यसपछि भने उहाँ झापाको गोलधापमा कक्षा ४ अध्ययन गर्न झर्नुभएको थियो । ठिक त्यसैबेला नेपालमा पञ्चायती व्यवस्थाविरुद्धको विद्यार्थी आन्दोलन चर्कियो । उहाँ पनि अन्य विद्यार्थीहरुसँगै जुलुसमा सहभागी हुनुभयो । त्यसबेला उहाँको उमेर मात्रै १३ बर्षको थियो । तसर्थ यो भन्न सकिन्छ कि उहाँमा सानै उमेरदेखि राजनीतिक चेतनाको विज अंकुराएको थियो ।

२०३६ सालको विद्यार्थी आन्दोलन पछि अध्ययनको सिलसिलामा उहाँ २०३७ सालमा धरान आउनु भयो । धरानको शिक्षा निकेतन माविमा भर्ना भएर अध्ययन थाल्नुभयो र २०४२ सालमा एसएलसी पनि दिनुभयो । मावि तहमा अध्ययनकै क्रममा शुल्क अत्यधिक वृद्धि भएपछि त्यसकोविरुद्धमा विद्यार्थीहरुले आन्दोलन छेडेका थिए । त्यस आन्दोलनमा सुब्बा पनि सक्रियता पुर्वक सहभागी हुनुभयो, र भाषण नै गर्नुभएको थियो । २०४० सालको त्यस घटना हुदा उहाँ कक्षा ८ मा अध्ययन गर्दैहुनुहुन्थ्यो । त्यसबेला नै उहाँ अनेरास्ववियुको सदस्य हुदै नगर कमिटि सदस्य बन्नुभयो । त्यसपछि राजनीतिमा सक्रिय हुनुभएका सुब्बा थाक्नु भएको छैन । तीन दशक लामो राजनीतिक यात्रामा जति समय बित्दै गयो, उहाँ उतिकै चम्किलो सुर्य भएर धरानको राजनीतिक आकाशमा उदाइरहनु भएको छ । अध्ययनको सिलसिलामा धरान आउनुभएका सुब्बाले धरानलाई आफ्नो कर्मथलो मात्र बनाउनुभएन, यहीको स्थायी बासिन्दा पनि हुनुभयो । उहाँ हाल धरान उपमहानगरपालिकाको वडा नम्बर १७ मा स्थायीरुपमा बसोबास गर्दै आइरहनु भएको छ ।

पहिलो र दोस्रो जनआन्दोलनमा नेतृत्व

 

१३ बर्षकै उमेरमा पञ्चायतविरुद्धको आन्दोलनमा सरिक हुनुभएका सुब्बाले २०४६ सालको जनआन्दोलनमा झनै सक्रियतापुर्वक लाग्नुभयो । निरंकुश पञ्चायती व्यवस्थाकोविरुद्ध लाग्नु ज्यादै जोखिमपुर्ण कार्य थियो । उहाँ २०४० सालमा नै राजाविरुद्ध देशीलाइनमा पम्प्लेटिङ गर्नेक्रममा पक्राउ पर्नुभएको थियो । भानुचौकमा रहेको प्रहरी कार्यालयमा २ दिनसम्म थुनामा पनि बस्नुभयो । जतिबेला जही पनि पक्राउ पर्न सक्ने र पक्राउ पर्दा ज्यानै पनि जानसक्ने खतरा थियो । तर, आफ्नो ज्यानको कुनै पर्वाह नगरी उहाँ प्रजातन्त्रको लागि आन्दोलनमा होमिनु भयो । जोखिम मोल्दै आन्दोलनकारीहरुले विभिन्न गल्ली र चोकहरुबाट सानो समुहमा जुलुस निकाल्ने गर्थे । थोरै संख्यामा भएपनि जुलुसले राजा र पञ्चायतविरुद्ध नारा घन्काउथे, र कुलेलाम ठोक्थे । त्यस्तै आन्दोलनकारी समुहलाई सुब्बाले निकेतन गल्लीबाट नेतृत्व गर्नुभएको थियो । उहाँहरुकै त्याग, वलिदानीपुर्ण कार्यले गर्दा २०४६ सालमा निरंकुश पञ्चायती शासनको अन्त्य भयो, र प्रजातन्त्रको पुनःउदय भएको थियो ।

दरबार हत्याकाण्डमा तत्कालीन राजा विरेन्द्र शाहको वंशनाश भएपछि २०५८ सालमा नाटकीय शैलीमा ज्ञानेन्द्र शाह नेपालको राजा बने । आफु राजा बनेको केही समयपछि नै कु गर्दै शासनसत्ता आफ्नो हातमा लिएर तानाशाही लादे । त्यसविरुद्ध विस्तारै देशव्यापीरुपमा जनता सडकमा उत्रिए । नेकपा एमालेसहितका अन्य राजनैतिक दलहरु पनि धरानमा ज्ञानेन्द्र शाहविरुद्ध सडकमा उत्रियो । उहाँ २०६२÷०६३ को जनआन्दोलनको समयमा संघर्ष समितिको सचिवको जिम्मेवारी पाउनुभएको थियो । अन्ततः ज्ञानेन्द्र शाह जनताको शक्तिसामु झक्न बाध्य भयो, नेपालमा गणतन्त्र आयो ।

 

अखिल, युवा संघ हुदै पार्टी अध्यक्षसम्म

 

२०४० सालमै अनेरास्वयवियु नगर कमिटि सदस्य बनेका सुब्बा २०४७ सालपछि भने युवा  संघको राजनीतिमा प्रवेश गरे । त्यसबेला युवा संघलाई प्रजातान्त्रिक राष्ट्रिय युवा संघ भनिन्थ्यो । संघको नगर कमिटि पछि जिल्ला कमिटि संयोजक हुदै २ पटक जिल्ला अध्यक्ष हुनुभयो भने २ पटक केन्द्रीय सदस्य पनि बन्नुभयो ।

यसैगरी, उहाँ २०४८ सालदेखि नै नेकपा एमालेको धरान नगर कमिटि सदस्य बन्नुभएको थियो, र हालसम्म पनि निरन्तर नगर कमिटिमा बिशेष पदीय जिम्मेवारीका साथ रहनुभएको छ । २०६२÷०६३ को जनआन्दोलनपछि उहाँले सचिवको कार्यकारी पद सम्हाल्ने मौका पाउनुभएको थियो । पार्टीमा नगर सदस्य हुदै उपसचिव, कार्यवाहक सचिव, सचिव हुदै पार्टीमा बहुपदीय प्रणाली शुरु भएपछि अहिले तेस्रो पटक अध्यक्ष बनेर धरान उपमहानगरपालिकामा नेकपा एमालेलाई कुशलतापुर्वक नेतृत्व गरिरहनु भएको छ ।

२०५१ सालमा नेकपा एमालेले स्वर्गीय मनमोहन अधिकारीको नेतृत्वमा अल्पमतको सरकार बनाउदा सुब्बाले खेलकुद विकास समिति सुनसरीमा कार्यकारी पद सचिवमा नियुक्ती पाउनुभएको थियो भने २०५४ सालको स्थानीय चुनावमा वडा नम्बर १७ मा वडा सदस्य जित्नुभएको थियो । त्यसपछि जिल्ला विकास समिति सुनसरीमा इलाका नम्ब २ बाट जिविस सदस्य पनि चुनिनु भएको थियो ।

 

 

देश र जनताको लागि राजनीति

 

राजनीतिक दल र नेता भन्नेवित्तिकै जनताको नजरमा भ्रष्ट, पैसा र सत्ता लोलुप नेता भन्ने परेको छ । हुन पनि अधिकांश नेताहरुले यस्तै चरित्र देखाएका छन् । तर, सुब्बाले भने केही पाउनको लागि राजनीति गर्नुभएको होइन । देश र जनतालाई अन्याय, अत्याचारबाट मुक्ति दिलाउनको लागि उहाँ राजनीतिमा होमिनुभएको हो । उहाँले कक्षा ८ मा पढ्दा नै चर्को शुल्क वृद्धिकोविरुद्धमा आन्दोलनमा होमिनुभयो, जसले गर्दा उहाँमा अन्याय, अत्यचार, शोषणाबाट देश र जनतालाई मुक्ति दिलाउनुपर्छ भन्ने भावना जगाइदियो । त्यही भावनालाई आत्मसात गर्दै उहाँ अहिलेसम्म निष्ठापुर्वक राजनीतिमा सक्रिय हुनुहुन्छ । उहाँको परिवारमा एक छोरा र श्रीमति हुनुहुन्छ, दुवै जना आर्थिकरुपमा सवल हुनुहुन्छ । तसर्थ, उहाँमा केही पाउने, कमाउने भन्ने लोभलालच छैन । आफ्नो सम्पुर्ण जीवनलाई देश र जनताको लागि सर्मपण गर्नुभएका सुब्बालाई यसमा कुनै पछुतो पनि छैन ।

अहिलेसम्म जे जति गर्नुभएको छ, र गरिरहनु भएको छ त्यसबाट उहाँ सन्तुष्ट नै हुनुहुन्छ । थप जिम्मेवारी पाएमा इमान्दारीताको साथ पुरा गर्ने उहाँको अठोट छ । धरानलाई केन्द्र बनाएर राजनीति गरिरहनु भएका सुब्बा धरान र धराने जनतालाई कसरी समृद्ध बनाउने भनेर चिन्तन गरिरहनु भएको छ ।

 

धरानमा एमालेको योगदान र भावी योजना

 

धरानलाई जनसहभागीताको नमुना शहर भनेर नेपालमै चिनाउने काम नेकपा एमालेले गरेको हो । धरानमा २०४९ साल र २०५४ सालको स्थानीय निर्वाचनमा जित हासिल गरेपछि लिएको नीति र कार्यक्रमले नै आधुनिक धरानको जग बसालेको हो । एमालेको नेतृत्वमा नगरपालिकाले ६०÷४० को जनसहभागिताको नीति लियो, र मृत शहरबाट समृद्ध शहरको बाटोमा डोर्यायो । धरानमा सफा पक्की सडक बन्यो, सडकको मापदण्ड तोकियो । व्यवस्थित नगर बनाउनको लागि घर नम्बरीङ पनि एमाले नेतृत्वकै पालामा लागुभएको थियो । एमालेका नेताकै पहल र नेतृत्वमा घण्टाघर बन्यो । भानुचौकको बसपार्कको विकल्पमा तीनकुने सुन्दर बस्ती विकास आयोजना र डाँडाघोपामा एयरपोर्ट निर्माणको प्रक्रिया एमालेका मेयर मनोजकुमार मेन्याङबोको नेतृत्व रहदा नै नगरपालिकाले शुरु गरेको थियो । खानेपानीको दीर्घकालीन समाधानको लागि एमालेले समिति नै बनाएर अध्ययन गरेको थियो र हालको परियोजना ल्याउन पनि निर्णायक भुमिका खेल्यो ।

नेकपा एमालेले धरानलाई कस्तो नगर बनाउने भनेर दीर्घकालीनरुपमा भिजन नै तयार गरेको छ । स्थानीय तहको निर्वाचन हुनुअघि त्यही भिजनको आधारमा नेकपा एमालेले धरानमा जित हासिल गरेपछि स्थानीय सरकार बनाएर के कस्तो नीति अपनाउने र कार्यहरु गर्ने भनेर प्रतिवद्धता पत्र तयार गरिसकेको छ ।

 

Author: Election Media

I am a learner in writing and trying my best but also not satisfied with my articles and piece. May your suggestion and this personal blog help me to write a nice piece ever. Please leave comment and feedback for me at...nawarajrai2020@gmail.com

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s